Dili, 10 Jullu 2026 – Ministériu Negósiu Estranjeiru no Kooperasaun (MNEC), Komisaun Funsaun Públika (CFP), no Governu Australia lansa edisaun segundu Programa Formasaun Lian Inglés ba Adezaun ASEAN – English Language Training for ASEAN Accession (ELTAA), atu kontinua hametin kapasidade língua Inglesa ba funsionáriu públiku sira hodi apoiu partisipasaun Timor-Leste iha prosesu ASEAN no kooperasaun rejionál.

Funsionáriu governu hamutuk nain 284 husi ministériu no ajénsia mak sei partisipa iha edisaun segundu husi formasaun ne’e. Hosi total ne’e, partisipante foun nain 151 foin lalais ne’e kompleta sira nia teste hodi tuir formasaun. Partisipante foun sira ne’e kompostu husi feto 49 pursentu  no mane 51 porsentu , ne’ebé hatudu partisipasaun di’ak hosi feto no mane iha servisu públiku. Partisipante hirak ne’e mai husi ministériu no ajénsia governu hamutuk 27, ne’ebé serbisu iha pilar ASEAN Political-Security Community (APSC) no ASEAN Socio-Cultural Community (ASCC).

Iha edisaun segundu ne’e, inklui mos partisipante nain 133  mai husi edisaun primeiru ne’ebé remata ona ho susesu sira nia formasaun no kontinua ba iha edisaun segundu. Funsionáriu sira-ne’e mai hosi ministériu no ajénsia governamentál hamutuk 15, ne’ebé serbisu iha pilar ASEAN Economic Community (AEC). Total partisipante hamutuk nain 284 ne’e mai hosi instituisaun governu ne’ebé serbisu iha pilar tolu hosi Komunidade ASEAN, ida ne’e demonstra kompromisu governu tomak atu hametin preparasaun Timor-Leste ba adesaun ba ASEAN.

Programa ELTAA Finánsia hosi Governu Austrália  hodi apoiu Timor-Leste nia esforsu atu adere no integra ba ASEAN liuhosi hadi’a abilidade prática língua Inglés  ba funsionáriu governu sira ne’ebé envolve iha responsabilidade relasiona ho ASEAN.

Programa ne’e fornese treinamentu língua Inglés ne’ebé orienta ba nesesidade iha fatin servisu no adapta ho nesesidade funsionáriu governu sira. Kursu sira ne’e dezenvolve atu hametin kapasidade komunikasaun partisipante sira no hasa’e sira-nia kapasidade atu kontribui ho efetivu iha reuniaun ASEAN, kooperasaun rejionál no envolvimentu internasionál.

Lansamentu edisaun segundu husi Programa ELTAA marka tan etapa importante ida iha esforsu Timor-Leste atu dezenvolve servisu públiku ida ne’ebé iha kapasidade, konfiansa no kompeténsia atu apoiu  nasaun ne’e nia adezaun ba ASEAN no nia envolvimentu iha futuru  nu’udar Estadu-Membru.